D Biwaldalp liit am rächtä Talhang vum Groosstal unterhalb vum Sassigrat uf ärä Heechi zwischet 1500 und 2000 Meter uber Meer.
Uf dr Biwaldalp git äs äs Bärggaschthüüs mit ämä Reschtärant, Doppelzimmer und Massälaager. Dr Energiiverbrüüch wird dur Sunnäenergii teckt.
D Milch wird zu Alp- und Schpezialchääs, Jogurt, Molkä und Ankä witerverschaffet. Alli Produkti vu hiä sind äü am Ürner Alpchääsmärcht erhältlich.
«I derä Gäged sell äinisch äs Wildmanndli amänä Gämschijeger ä Chääs mit dr Bedingig gschänkt ha, dass är nimmä jagä terf. Drfir tääg dr Chääs niä schwiinä und äister wider nachäwachsä, wenn är ä nit ganz üfässi. Nach ärä gwissä Zit häig är de der Chääs gliich ribis schtibis ggässä und etz häig är äü wider uf d Jagd miässä. Det sig är de vu dem Wildmanndli z Hutlä und z Fätzä verrissä wordä.»
Ürner Sagäwält